E derechi riba un medio ambiente limpi, saludabel i sostenibel.

Boneiru, 21 di ougùstùs 2025

Fundashon Pro Lagun ta gradisí Instituto pa Derechonan Humano pa nan analisis balioso i profundo tokante e situashon na Boneiru.

E resultadonan di e Instituto di Derechonan Humano di Hulanda ta konfirmá loke hopi habitante—partikularmente den e área di Lagun—a eksperensiá i a lucha p’e pa dékadanan: e derechi riba un kalidat di bida seif i saludabel.

Ta doloroso, pero tambe importante, pa mira pretu riba blanku ku e sintimentunan di hopi hende ta korekto: nos derechonan humano a wòrdu violá pa añanan largu. E negligensia di tanto gobierno lokal komo nashonal di Reino Hulandes ora ta trata di e derechonan fundamental aki no por wordu ignorà mas.

Nos ta ripití nos yamada urgente: hasi screening di salú individual pa tur (eks) habitante ku ta biba serka di e landfill. Nos no sa e ekstenshon di e impakto – Nos no sa kon grandi e área afektá ta – e por ta un parti basta grandi di nos isla – i nos no sa kuantu hende awor òf den futuro lo bira malu pa motibu ku a/ta wordu eksponé largu tempu na substansianan dañino for di e landfill i e incinerator di sushi ku a wordu uza di un manera no professional hopi aña.

Bida di hende ta na peliger aki. Posibelmente tin malesa ku ta keda sera den kurpa, ku a wordu kousa òf a empeorá pa motibu di e kontaminashon. Rekonose e kausa y tuma responsabilidad pa e violashon aki di añanan largo di derechonan di siudadanonan ta e uniko paso korekto.

Pa e habitantenan di Lagun, pa hinter Boneiru, i pa generashonnan ku ta bini, nos ta eksigí ku palabra finalmente bira akshon ku por wak. No solamente traha riba e landfill, pero tambe, i spesialmente, dor di investigá e daño kousa, rekonosé i atendé esaki.